كتب خالد خميس
مطاريد كاذبون.. دي الصفة اللي يستحقها كل المطاريد واللجان الإخوانية بكل قنواتهم ومنصاتهم، ودي مش صفة جديدة عليهم وهما عارفين دا.. بس الكلام دا لكل حد بيصدقهم أو بيسمع لهم.
كام مرة قالوا إن الرئيس السيسي وافق على تهجير الفلسطينيين إلى سيناء؟ دا مش بس كدا دا قالك دي معلومات ومصادر وإن مصر هتاخد المقابل 120 مليار دولار كمان، دا قالك كمان إن مصر هتاخد عليهم 60 مليار دولار تكاليف تأجير شقق خاليه اتعملت مخصوص في سيناء!
طيب مش هما برضوا اللي قالوا وكتبوا على عناوين فيديوهاتهم إن التهجير بدأ وإن مصر بتنشئ منطقة عازلة لاستقبال الفلسطينيين؟ اللي كتب العنوان دا أسامة جاويش بالمناسبة ومكتفاش بكدا دا طلع في برنامجه يقول إنه بيكشف كتالوج الرئيس السيسي مع إسرائيل لقبول خطة التهجير لسيناء، دا قال كمان إن التهجير بدأ!
أسامة جاويش مكتفاش وقال يوم 23 نوفمبر 2023 إن الرئيس السيسي رافض التهجير بالتصريحات فقط وعلى الأرض الخطة ماشية!، وفي 14 فبراير قال أسامة إن التهجير بدأ وإن مصر بتبني منطقة عازلة.
ومحمد ناصر يوم 19 فبراير 2024 قال بالنص: ” صفقة القرن تمت من زمان والسيسي قبض الثمن وخلص الموضوع”.. مش بس كدا دا يوم 27 ديسمبر 2023 ادعى كذبا إن الرئيس قال إننا لازم نسمع كلام نتنياهو ونقبل بالتهجير!
وأحمد سمير يوم 18 إبريل قال: “ياترى السيسي بيبني مدينة رفح الجديدة لمين ولا التهجير بدأ خلاص”، وإمعانا في الكذب استعان أحمد سمير يوم 28 ديسمبر 2023 بالإسرائيلي “إيدي كوهين” وقالك إن خطة التهجير بدأت!
شريف عثمان وهشام صبري وشبكة رصد وكل حسابات لجان المطاريد وجماعة الإخوان الإرهابية كلهم قعدوا يرددوا نفس الكلام بأشكال مختلفة وكأنهم بيقولوا معلومات يقينية بتحصل قدام عينيهم، والنتيجة! النتيجة إنهم كانوا زعلانين جدا امبارح باتفاق وقف إطلاق النار وفشل مخطط التهجير لأنهم كانوا بيتمنوا إن أكاذيبهم تتحقق على أرض الواقع عشان يبقى قالوا حاجة واحدة في حياتهم وطلعت صح مهو مش معقول كل ما يقولوا حاجة تطلع فشنك أصل هيبقى شكلهم وحش أكتر من كدا ايه!
احنا فاهمين هما كانوا بيعملوا كدا ليه، والموضوع معاهم مش بس إنهم بيكذبوا وبيعملوا عناوين رنانة في محاولة بيعها للناس، هما كانوا بينفذوا أجندات ضغط على الدولة المصرية وزرع التشكيك في نفوس الناس عشان تشك في الإدارة والقيادة السياسية، لكن كالعادة المصريين كان عندهم من الوعي الكافي إنهم ميصدقوش المطاريد ولا إعلامهم لأنهم عندهم كامل الثقة في الإدارة والدولة المصرية والرئيس السيسي وعارفين إن مصر لم ولن تُفرط في شبر واحد من سيناء ولن تسمح بالتهجير ودا لأن الرئيس السيسي من بداية الحرب على غزة كان واضح وقالها في مختلف المناسبات والمؤتمرات والقمم: “التهجير بالنسبة لنا احنا خط أحمر لن نقبل به ولن نسمح به”، وطالما الرئيس قال ف الشعب المصري كله صدق الرئيس لأنه كالعادة لما بيقول بينفذ وعمره ما خذل المصريين من أول يونيو 2013 ، وعشان كدا هما من ساعتها بيحاولوا يأثروا على الثقة دي لكن محاولاتهم كالعادة بتفشل وهتفضل تفشل.
موقف المطاريد من التهجير باختصار بيقول لنا إن المطاريد ولجانهم وقنواتهم ولجانهم اعتادوا الكذب وهيفضلوا يكذبوا ومستمرين في الكذب وعشان كدا محدش بيصدقهم ولا بينصاع ليهم ولا بيمشي وراهم! كام مرة يعملوا مؤامرات لهدم البلد؟ كام مرة طلعوا شائعات عشان الناس تصدقها وتمشي وراها؟ وكام مرة قالك هنعمل ثورة عشان نهد البلد ونبنيها! طيب وهو في حد بيصدقكم أصلا أو في دولة حوالينا اتهدت واتبنت؟ كام مرة قالك “متصدقش” القيادة ومؤسسات الدولة والحكومة وصدقونا احنا رغم إنهم عارفين ومتأكدين إنهم مجرد “مطاريد كاذبون”